निजगढ,बारा प्रहरीले प्रतिबन्धित लागू औषधसहित निजगढका दुईजनालाई सोमबार कलैयाबाट पक्राउ गरेको छ । जिल्ला प्रहरी कार्यालय बाराबाट खटिएको टोलीले उनीहरुलाई लागू औषध सहित कलैया उपमहानगरपालिका वडा नम्बर १ देवकोटा चोकबाट पक्राउ गरेको हो । पक्राउ पर्नेहरुमा निजगढ नगरपालिका वडा नम्बर ६ योजना टोल बस्ने २९ वर्षीय हेमबहादुर थापा र सोही ठाउँका आशिष तामाङ रहेका छन् । वीरगञ्जबाट निजगढतर्फ आउदै गरेको अवस्थामा उनीहरु सवार ना ५६ प ८७७१ नम्बरको पल्सर मोटरसाइकललाई शंका लागि प्रहरीले रोकेर जाँच गरेको थियो । सोही क्रममा लुकाइ छिपाइ लैजादै गरेको अवस्थामा लागुऔषध ट्याब्लेट र इन्जेक्सन सहित उनीहरु पक्राउ परेका बाराका प्रहरी निरीक्षक तथा सूचना अधिकारी विरेन्द्रराज गुरुङले जनाउनुभयो । उनीहरुको साथबाट डाइजेपाम ५६ एम्पुल, फेनारगन ५३ एम्पुल, नुरफिन ५३ एम्पुल र ट्रामानिल ५६ पत्ता ( ६५० पिस) बरामद भएको प्रहरीले जनाएको छ । पक्राउ परेकाहरुमाथि आवश्यक कानुनी प्रक्रिया अघि बढाइएको बारा प्रहरी बताएको छ ।
