
रौतहट,रौतहटको फतुवा बिजयपुर नगरपालिकास्थित सन्तपुर दोस्तिया चोकमा टिपरको ठक्करबाट शुक्रवार दिउँसो मोटरसाइकल चालकको मृत्यु भएको छ । कोपवा बजारमा सिमेन्ट पुर्याएर निजगढतर्फ फर्किदै गरेको ना ५ ख ३४५१ नम्बरको ट्रकले ना ५१ पा ४९४१ को मोटरसाइकललाई ठक्कर दिदाँ चालक फतुवा बिजयपुर वडा नम्बर १ का ३५ वर्षीय उमेश यादवको घटनास्थलमै मृत्यु भएको हो । तीव्र गतिमा रहेको ट्रकले मोटरसाइकललाई ठक्कर दिँदा चालकको मृत्यु भएको स्थानीयवासीले बताएका छन् । ट्रकको ठक्करबाट यादवको टाउको क्षतविक्षत भएको छ भने मोटरसाईकल पनि पूर्ण रुपमा क्षतिग्रस्त भएको छ । घटनालगतै स्थानीयले गरेको कुटपिटबाट ट्रक चालक बारा निजगढ ६ का मुकुन्द पोखरेल घाइते बनेका छन् । पोखरेललाई इलाका प्रहरी कार्यालय सन्तपुर दोस्तियाबाट गएको टोलीले सुरक्षा दिँदा स्थानीयवासी र प्रहरीबीच झडप भएको थियो । झडपमा प्रहरीले ३ राउण्ड हवाई फायर गरेको इलाका प्रहरी कार्यालय बिजयपुर लक्षमिनियाका प्रमुख इन्स्पेक्टर विजय कार्कीले बताउनुभयो । झडपमा प्रहरी कार्यालय को झ्यालको सिसा फुटेका छन् भने केही प्रहरी घाइते भएका छन् । ट्रक चालक पोखरेललाई उपचारका लागि वीरगञ्ज अस्पताल पठाइएको प्रहरीले बताएको छ । घटना भएलगत्तै अपरान्ह ३ बजेदेखि नै मृतकका आफन्तले बन्कुल– निजगढ सडकखण्ड अन्तर्गत सन्तपुर दोस्तिया चोकमा शव तेर्साएर बाटो अवरुद्ध गरेका छन् । उनीहरुले दोषीमाथि कारबाही र क्षतिपूर्तिको मागसहित नारबाजी गरेका थिए । जिल्ला प्रहरी कार्यालय गौर र सशस्त्र प्रहरी बेस क्याम्पबाट दर्जनौं सुरक्षाकर्मी घटनस्थलमा परिचालन गरिएको छ ।